Kva viser EKG?
EKG blir brukt til å sjå om hjartet
- slår regelmessig
- har ujamn rytme (rytmeforstyrring)
- har ekstraslag
Hastigheita og utbreiinga av dei elektriske impulsane seier også noko om eventuell skade på hjartemuskelen og tjukkelse eller størrelse av hjartet.
EKG er ein viktig del i utgreiing og kontroll av alle slags hjarteproblem og -sjukdomar.
Korleis går undersøkinga føre seg?
EKG blir gjort hos fastlegen eller på sjukehus, og krev ingen spesielle førebuingar. Det er ofte ein sjukepleiar eller helsefagarbeidar som tar EKG.
Under EKG-undersøkinga ligg du, og må ta av deg kleda på overkroppen.
Klistrelappar med ulike leidningar blir festa på huda. Du får ein leidning festa på kvar arm og kvar fot, i tillegg til leidningar på brystet. Leidningane blir så kopla til EKG-apparatet som registrerer dei elektriske impulsane i hjartet.
Du får svar etter at ein lege har tolka EKG-et.
Gjer EKG vondt?
Sjølve undersøkinga tar cirka fem minutt og er heilt smertefri. Du merker ikkje at registreringa blir utført. Resultatet blir best om du ligg stille.
Det er ingen risiko knytt til undersøkinga.