Få hjelp tidleg
Dersom det gjer vondt kvar gong du ammar, eller brystknoppane sprekk og du får sår, bør du be om hjelp så tidleg som mogleg. Kontakt helsestasjonen eller ein annan person med god kunnskap om amming. Dei kan observere korleis barnet diar og hjelpe deg med å finna årsaka til kvifor du har vondt.
Saman kan de finne ei ammestilling og ein måte å leggja barnet til brystet på som hjelper barnet å få eit djupare og meir behageleg tak. Når barnet har eit godt tak, ligg brystknoppen langt bak i munnen til barnet, opp mot den mjuke ganen. Viss barnet berre får tak ytst på brystet, blir belastninga på brystknoppen stor og kan føre til smerte og sår.
Teikn på dårleg sugetak
- Smerter under og etter amming
- Kvit, flat eller kileforma brystknopp etter amming
- Langvarige ammingar og liten vektoppgang hos barnet
- Eit barn som verkar uroleg eller utilfreds under og etter måltidet
Sjå ein video om korleis barn kan få godt sugetak.
Kva kan du gjere sjølv?
Det finst ting du kan gjere sjølv for å lindre, men dei har liten effekt viss barnet held fram med å die med eit dårleg tak. Såra vil som regel ikkje gro før barnet får eit godt tak i brystet.
- Vask såret med reint vatn dagleg – ikkje bruk såpe på brysta
- Ha reine hender og unngå å ta direkte på såret
- Såre brystknoppar utan sprekkar eller opne sår kan lufttørkast
- Ved opne sår, brukar du ein skumbandasje som ikkje festar seg og som held såret fuktig, så det gror lettare.
- Ei feit salve berekna på brystknoppar kan lindre smerte. Den skal ikkje smørjast direkte i såret, men rundt sårkanten og eventuelt på skorper. Ver merksam på at alle salver og kremar kan gi hudreaksjonar.
- Handmjølking eller pumping kan avlaste ved behov
Prøv ulike ammestillingar – til dømes kan ein tilbakelent ammestilling hjelpe. Start gjerne med det brystet som gjer minst vondt. Når utdrivingsrefleksen er i gang, går det ofte lettare å amme på det vonde brystet.
Ikkje kort ned på amminga for å skåne brystet utan samtidig å stimulere brysta på ein annan måte. Sjølv om det gjer vondt, er det viktig å halde oppe mjølkeproduksjonen ved å amme, handmjølke eller bruke pumpe.
Du kan bruke paracetamol mot smertene. Om nødvendig kan du kombinere det med ibuprofen, hvis du toler det.
Helsedirektoratet har ikkje tilstrekkeleg dokumentasjon til å kunne tilrå bruken av sølvkoppar eller brystskjold ved såre brystknoppar.
Når sår ikkje vil gro
Viss såret ikkje blir betre sjølv etter at barnet har fått godt sugetak, kan det vere infeksjon. Då bør du kontakte helsestasjon eller fastlegen din for å ta ein prøve av såra og brystmjølka di for å undersøkje om det er bakteriar der.
Teikn på mogleg infeksjon
- Sår som ikkje gror
- Gulaktig eller illeluktande væske frå såret
- Stikkande eller verkande smerter i brystet både under og etter amming