Om kjernejournal
Alle fastbuande i Noreg, inkludert barn, har ein kjernejournal, med unntak av dei som har reservert seg mot det.
Helsepersonell kan sjå opplysningane i kjernejournalen din uavhengig av om dei jobbar på sjukehus, fastlegekontor, legevakt eller i kommunale pleie- og omsorgstenester. Blir du til dømes lagd inn på eit sjukehus der du ikkje har vore før, vil helsepersonell kunne slå opp i kjernejournalen din og finne dei viktigaste helseopplysningane om deg. Dette kan gi deg rett behandling raskare.
Kjernejournal gir helsepersonell tilgang til følgande pasientinformasjon ved yting av helsehjelp:
- Kritisk informasjon
- Vaksinar
- Donorkort
- Reseptar og legemiddel
- Prøvesvar
- Dokument
- Besøkshistorikk
- Behandlingsplan
- Eigne registreringar
Merk at nokre få legevakter og kommunar ikkje har tatt i bruk kjernejournal enno.
Personvernrettar
Helsedirektoratet er dataansvarleg for kjernejournal. Det betyr at dei er ansvarlege for å behandle informasjon om deg på ein måte som varetar personvernet ditt. Du har rett til innsyn i opplysningane i kjernejournalen din, innsyn i bruken av opplysningane, og moglegheit til å avgrense tilgang til opplysningane. Dette finn du i tenesta Helseopplysningar som blir delte på Helsenorge. Du bør sjekke at opplysningane i kjernejournalen din stemmer, fordi opplysningane blir brukte til å gi deg rett behandling.
Merk at opplysningane i kjernejournalen din berre er tilgjengelege for autorisert helsepersonell i samband med pasientbehandling. Reservasjon mot å ha kjernejournal eller anna avgrensing av helsepersonell sin tilgang til opplysningane dine kan påverke helsehjelpa du får, særleg i ein akuttsituasjon.
Innsyn og endring i kjernejournal
På Helsenorge kan du få innsyn i kjernejournalen din, administrere personverninnstillingane dine knytte til kjernejournal og oppdatere opplysningane dine. Dette finn du i tenesta Helseopplysningar som blir delte.
Om du ikkje har høve til å gjere dette digitalt på Helsenorge, kan du bruke skjemaa nedanfor.