Personvern på Helsenorge

Denne personvernerklæringa beskriv kva personopplysningar vi behandlar, kvifor og korleis. Du finn også informasjon om rettane du har og korleis du utøver desse.

Personvern før eg har logga inn på Helsenorge

  • Norsk helsenett er behandlingsansvarleg. Det betyr at vi er ansvarlege for behandlinga av personopplysningar på Helsenorge sine opne sider. Vi er også ansvarlege for drift og vedlikehald av nettstaden.

    Lenker til eksterne nettsider

    På Helsenorge har vi lenker til andre organisasjonar og verksemder. Ver merksam på at personvernerklæringa hos Helsenorge ikkje omfattar desse nettstadane. Når du er innom desse nettstadane, gjeld retningslinjene for den aktuelle nettstaden.

  • Nettsidebesøk

    Når du besøker Helsenorge, behandlar vi IP-adressa di. Dette er nødvendig for å kunne vise deg innhaldet på sidene. 

    Kontaktskjema

    Dersom du har spørsmål om tenester, sjølvbeteningsløysingar eller lurer på noko om informasjonen på Helsenorge, kan du ta kontakt med oss via eit kontaktskjema. Då vil meldinga di bli send til rettleiing Helsenorge (telefon 23 32 70 00).

    Dersom du brukar kontaktskjema vil namn, e-postadresse og det du skriv i meldinga bli lagra. Meldinga blir sletta etter at rettleiingstenesta har svart på meldinga.

    Vi ber om at du ikkje oppgir sensitive opplysningar, til dømes helseopplysningar eller fødselsnummer, då kontaktskjemaet ikkje er sikra (kryptert).

  • Chatboten som ligg på Helsenorge er levert av Helsedirektoratet. Helsedirektoratet er behandlingsansvarleg for behandlinga av personopplysningar som skjer i chatboten.

    Norsk helsenett behandlar ikkje personopplysningar i samband med bruk av denne chatboten, men legg til rette for at chatboten er tilgjengeleg på Helsenorge. Kommunikasjonen går mellom deg og Helsedirektoratets leverandør.

    Dersom du har fleire spørsmål om chatboten si behandling av personopplysningar, kan du ta kontakt med personvernombodet i Helsedirektoratet på e-post: personvernombud@helsedirektoratet.no.

  • Helsenorge brukar analyseverktøyet Adobe Analytics. Alle IP-adresser blir anynomisert før opplysningane blir lagra og brukte vidare, slik at opplysningane ikkje kan sporast tilbake til deg. Berre anonyme opplysningar blir lagra.

     Døme på informasjon som blir samla inn er 

    • kor mange nettleserarar som besøker Helsenorge
    • kva nettsider brukarane kjem frå
    • kor lenge brukarane er på nettsida
    • kva nettlesarar som blir brukte

  • Vi brukar informasjonskapslar (cookies) på nettstaden vår. Nokre av informasjonskapslane må vi bruke, andre kan du velje om vi får bruke.

    Du kan når som helst endre på kva du tillet av informasjonskapslar.

    Les meir om informasjonskapslar på Helsenorge.

Personvern etter at eg har logga inn på Helsenorge

  • Dersom du vil ta i bruk tenestene på dei innlogga sidene på Helsenorge, treng vi ditt samtykke for å behandle personopplysningar om deg.

    Samtykke til behandling av personopplysningar på Helsenorge er delt i ulike trinn. Det betyr at du kan velje å samtykke til nokon, fleire eller alle tenestene på Helsenorge. Du kan lese meir om dei ulike samtykka her.

    Informasjonen på denne sida forklarer deg korleis vi behandlar personopplysningane dine. Behandlinga vil variere etter kva tenester du vil nytte, og kva samtykke du har gitt.

    Fullstendige bruksvilkår for Helsenorge-tenestene finn du her (pdf).

    Personopplysningar er opplysningar og vurderingar som kan knytast til deg som person, som til dømes fødselsnummer, IP-adresse, adresse og kva reseptar du har. Ei behandling av personopplysningar kan til dømes vere innsamling, lagring, registrering eller utlevering av desse opplysningane.

  • Norsk helsenett er dataansvarleg og har dermed ansvaret for å behandle opplysningane dine knytt til bruk av Helsenorge og tenestene der. 

    Ein dataansvarleg er den som bestemmer føremålet med ei behandling av personopplysningar og kva hjelpemiddel som skal brukast.

    Når det gjeld eksterne tenester som er tilgjengelege via Helsenorge, er ulike verksemder dataansvarlege for sine tenester. Du skal kunne sjå i dei ulike tenestene kven som er dataansvarleg. 

    Ein databehandlar er den som behandlar personopplysningar på vegner av ein dataansvarleg.

    Norsk helsenett er databehandlar og leverandør av teknisk drift og vedlikehald av Helsenorge.

  • I enkelte tilfelle kan fødselsnummeret ditt utleverast, då desse personopplysningane er nødvendig for å kunne identifisere deg når du brukar tenestene. Dette gjeld til dømes ved bruk av videokonsultasjon, dialogtenester og postkassefunksjonen. 

    Fødselsnummer blir også lagra i tekniske loggar for å gjere det mogleg å finne og rette feil i tenestene. Fødselsnummeret blir ikkje formidla vidare, utlevert eller brukt til andre føremål.

    Personverninnstillingane dine kan utleverast til eksterne aktørar når innstillingane også gjeld desse eksterne leverandørane. Det kan til dømes vere opplysningar om fullmakter til å bruke Helsenorge på vegner av andre, og om du har samtykt til eller reservert deg frå å bruke enkelte tenester.

    Andre personopplysningar blir ikkje levert ut.

  • Ein del av tenestene på Helsenorge er visingtenester der vi hentar opplysningar frå andre når du loggar inn. Slike personopplysningar blir ikkje lagra på Helsenorge. Utover dette blir opplysningane om deg lagra så lenge du brukar Helsenorge, og så lenge det er nødvendig for det føremålet dei blei samla inn for.

  • Tilsette i Norsk helsenett har teieplikt.

    Tilsette kjem berre i kontakt med personopplysningane dine når dette er nødvendig for sikker drift av tenestene, og i tilfelle der du sjølv ønsker at våre tilsette skal hjelpe deg med å bruke tenestene.

  • Du skal vere trygg på at opplysningane dine blir sikra på ein god måte. Vi har gjort ei rekke tryggingstiltak for å beskytte personopplysningane vi behandlar mot både uautorisert tilgang, endring eller øydelegging. Dette inneber mellom anna at

    • vi krypterer kommunikasjonen til og frå tenestene våre.
    • vi avgrensar tilgang til personopplysningar for våre tilsette og databehandlarar og underleverandørar som skal behandle desse opplysningane på våre vegner.
    • vi har sett i verk omfattande fysiske, tekniske og organisatoriske tiltak for å sikre opplysningane på ein best mogleg måte.

  • Helsenorge brukar personopplysningar til å lage statistikk over bruken av tenestene. Dette gjer vi for å betre tenestene og for å få meir innsikt i korleis dei blir brukte. Statistikken blir delt og brukt også av helsesektoren og helsemyndigheitene for å betre tilgangen og kvaliteten på helsetenestene i Noreg.  

    Desse opplysningane om deg blir samla inn og brukte: 

    • demografiske opplysningar (til dømes alder, kjønn og kommunen du bur i) 
    • opplysningar om bruken av tenestene på Helsenorge (til dømes tal på skjema som blir sendt inn, tal på timebestillingar) 

    Opplysningane blir brukte på ein måte som gjer at dei ikkje direkte kan leiast tilbake til enkeltpersonar. Når vi set saman statistikken, følger vi retninslinjene i personvernregelverket for bruk av personopplysningar til statistiske føremål. Resultatet av statistikken kan ikkje leie tilbake til deg. 

Mine rettar

  • Du som brukar har rett til innsyn i kva personopplysningar vi behandlar om deg, og kva opplysningar som har vore behandla om deg i samband med din bruk av tenestene på Helsenorge. Du har også rett til innsyn i kva tryggingsstiltak vi brukar for å ta vare på personvernet ditt, så lenge vi kan gi innsyn utan å svekke tryggleiken i løysingane våre.

  • Du kan krevje å få retta opplysningar om deg dersom opplysningane er urette eller ufullstendige. 

    Du kan også krevje sletting av opplysningar dersom du meiner dei er unødvendige for føremålet. 

    For retting og sletting av opplysningar i eksterne tenester som du får tilgang til via Helsenorge, må du gå til den verksemda som tilbyr tenesta. Det er til dømes Skatteetaten når det gjeld opplysningar frå folkeregisteret, som adresse eller familierelasjonar.

  • Når helsepersonell får tilgang til viktige helseopplysningar om deg, kan dei gi deg trygg og god behandling når du treng det. Berre dei som kan dokumentere behovet, har lov til å lese helseopplysningane dine. Er det opplysningar du ikkje vil dele, kan du endre personverninnstillingane dine på Helsenorge. Les meir om rettane dine. 

  • Du kan når som helst trekke eller endre samtykket du har gitt til at Helsenorge kan bruke helseopplysningane dine. Dersom du trekker tilbake samtykket, har du framleis tilgang til alt innhald på Helsenorge som ikkje krever innlogging.

    Det finast også andre alternativ du kan velje når du ikkje vil bruke tenestene på Helsenorge. 

    Les om å trekke samtykke og andre alternativ du har når du ikkje vil bruke tenestene på Helsenorge.

Kontaktpunkt

Rettleiing Helsenorge

Ring 23 32 70 00
Måndag - fredag klokken 08:00-15:30

Personvernombod

Her finn du kontaktinformasjon til NHN sitt personvernombod.

Datatilsynet

Datatilsynet er tilsynsorgan og kontrollerer at lover og forskrifter som gjeld for behandling av personopplysningar blir følgde. 
Telefonnummer: 22 39 69 00
E-post: postkasse@datatilsynet.no
Organisasjonsnummer: 974761467
datatilsynet.no

Innhaldet er levert av Norsk helsenett

Norsk helsenett. Personvern på Helsenorge. [Internett]. Oslo: Helsedirektoratet; oppdatert tysdag 11. februar 2025 [henta måndag 20. april 2026]. Tilgjengeleg frå: https://www.helsenorge.no/nn/personvern/

Fann du det du lette etter?