Er du under 40 år, gravid eller ammar, eller har du barn som bur heime? Då bør du ha jodtablettar heime i tilfelle det skjer ei atomhending.
Illustrasjon: Aleksandr Davydov/Mostphotos
Ved ei atomhending kan radioaktivt jod bli spreidd i lufta og teke opp i skjoldbruskkjertelen når du pustar inn forureina luft eller får i deg forureina mat eller drikke. Dette kan føre til kreft i skjoldbruskkjertelen.
Dersom det skjer ei atomhending, vil styresmaktene gi råd om å ta jodtablettar dersom det blir nødvendig. Styresmaktene vil då gi informasjon om dette gjennom media og på ulike nettsider.
Ikkje ta jodtablettar utan at styresmaktene har gitt råd om det.
Jodtablettar kan ikkje brukast førebyggjande.
Det er viktig å skilje mellom høgdose-jodtablettar til bruk ved atomhending og kosttilskot med jod. Det er høgdose-jodtablettar som vernar mot kreft. Du får ikkje i deg nok jod gjennom kosttilskot til at dette vil førebyggje kreft.
Kven kan ha nytte av jodtablettar ved ei atomhending?
Det er først og fremst barn og unge under 18 år, gravide og ammande som vil få råd om å ta høgdose-jodtablettar. I heilt spesielle tilfelle vil styresmaktene gi råd om at også alle vaksne mellom 18 og 40 år tek jodtablettar. Personar over 40 år har svært låg risiko for å få kreft i skjoldbruskkjertelen som følgje av radioaktivt jod.
Kvifor skal du ta høgdose-jodtablettar?
Tilskot av høge dosar jod blokkerer opptaket av radioaktivt jod og reduserer dermed risikoen for kreft.
Spørsmål og svar
Det er mest aktuelt at barn og unge under 18 år, gravide og ammande tek høgdose-jodtablettar dersom det skjer ei atomhending. Dei har størst risiko for å få kreft i skjoldbruskkjertelen dersom dei blir utsette for radioaktivt jod. I heilt spesielle tilfelle bør alle under 40 år ta jodtablettar.
Personar over 40 år har svært låg risiko for å få kreft i skjoldbruskkjertelen som følgje av radioaktivt jod.
Du skal ikkje ta jodtablettar førebyggjande. Du skal berre ta jodtablettar etter råd frå styresmaktene. Dersom det skjer ei atomhending, vil du få informasjon om kva du skal gjere gjennom media, på nettsidene til Direktoratet for strålevern og atomtryggleik og her på Helsenorge.
Husstandar der det bur personar under 40 år, gravide eller ammande, bør ha jodtablettar heime.
Skular, barnehagar og institusjonar skal ha tablettane i beredskap slik at dei kan brukast ved atomhendinger. Skular og barnehagar har og planer for å sende tabletter med heim.
Ja. For å førebyggje kreft treng du éin stor dose jod. Det er lite truleg at du får i deg nok jod gjennom kosten eller kosttilskot til at det gir tilstrekkeleg effekt.
Jodtablettar er svært haldbare. Dei fungerer som dei skal sjølv om dei har gått ut på dato.
Barn og unge som er allergiske mot kaliumjodid eller nokre av dei andre innhaldsstoffa i legemiddelet, skal ikkje ta jodtablettar. I slike tilfelle bør ein snakke med lege.
Barn og unge med betennelse eller andre forstyrringar i skjoldbruskkjertelfunksjonen skal som hovudregel ta jodtablettar, men bør få kontrollert stoffskiftet hos lege i etterkant.
Det finst ikkje noko intravenøst alternativ til jodtablettar. Nokre barn eller vaksne som ikkje har tilstrekkeleg opptak av næring frå tarmen, kan likevel ta opp noko jod. Det kan vere eit alternativ å ta jodtablettar, men slik bruk må vere avtalt på førehand med legen som kjenner barnet eller ungdommen (eller den vaksne).