Fysioterapi i EU/EØS

Du får berre dekt nødvendige utgifter til behandling som er av vesentleg betydning for sjukdomen og funksjonsevna di. Innhaldet og omfanget av behandlinga må vere tilsvarande det du ville ha fått dekt i Noreg.

For å ha rett etter denne ordninga må du vere medlem av folketrygda. Ordninga gjeld òg i mange tilfelle for familiemedlemmar. Du kan ikkje få stønad til behandling i eit EU/EØS-land du blir rekna for å vere busett i. Her finn du viktig informasjon om kva personar som har rett til å nytte seg av ordninga.

Dersom du oppheld deg mellombels i eit anna EU/EØS-land og det oppstår ein situasjon som gjer at du treng nødvendig helsehjelp, kan du bruke Europeisk helsetrygdkort. Dette vil òg kunne gjelde fysioterapi.

Planlegg du å få helsehjelp i Storbritannia? Les om konsekvensar av brexit.

Fysioterapeuten må ha gyldig offentleg autorisasjon og lov til å praktisere i det aktuelle landet. Det er ditt ansvar å sjekke ut dette på førehand. Når du søker Helfo om refusjon, kan du bli bedt om å dokumentere at fysioterapeuten fyller krava.

Dersom behandlinga berre kan utførast av ein manuellterapeut eller ein psykomotorisk fysioterapeut, må behandlaren i utlandet ha tilsvarande spesialistgodkjenning/autorisasjon.

Du kan berre få dekt utgifter til behandling som svarer til den du ville fått dersom du hadde gått til ein fysioterapeut med kommunalt driftstilskot i Noreg. 

Beløpet du får refundert, er avgrensa til det behandlinga ville kosta for det offentlege i Noreg. Kostnadar for fysioterapibehandling blir berekna med utgangspunkt i norske offentlege takstar:

• Dersom du har betalt meir enn berekna kostnad i Noreg, vil refusjonsbeløpet vere lågare enn det du har betalt for helsehjelpa.
• Dersom du har betalt mindre enn berekna kostnad i Noreg, vil refusjonsbeløpet svare til dei faktiske utgiftene dine.

Behandlingsreiser i regi av spesialisthelsetenesta blir ikkje dekte

Fysioterapi som blir utført i utlandet som ein del av eit behandlingsopplegg i regi av spesialisthelsetenesta i Noreg, blir ikkje dekt etter denne ordninga. Ein pasient som har fått innvilga ei behandlingsreise til utlandet betalt av spesialisthelsetenesta, kan få behandlingar hyppigare enn det primærhelsetenesta dekker. Helfo kan berre dekke utgifter til same behandlingsomfang som primærhelsetenesta.

​Når du skal søke Helfo om refusjon, treng du

• journalnotat eller liknande dokumentasjon frå fysioterapeuten der diagnose, grunngiving for valt behandling og resultat av behandlinga kjem fram – journalnotatet må gjelde behandlinga du søker refusjon for
• original spesifisert faktura frå behandlingsstaden der det for kvar behandling kjem fram namn på fysioterapeuten, type behandling, behandlingsdato, tidsbruk og pris per behandling – ved gruppebehandling må det i tillegg kome fram at gruppa ikkje har hatt fleire enn 10 deltakarar, og at ein fysioterapeut har utført behandlinga 
• originale kvitteringar for alle utgifter eller annan dokumentasjon som viser at og når utgiftene er betalte
• dokumentasjon på autorisasjonen til fysioterapeuten og eventuelt på tilleggsutdanninga til fysioterapeuten (til dømes manuellterapi)

For at Helfo skal kunne ta stilling til kravet, må dokumentasjonen vere forståeleg for oss. Det betyr at han i utgangspunktet må vere på norsk, dansk, svensk eller engelsk. Du bør derfor prøve å få skrive ut dokumentasjonen på eit av desse språka. Dersom dokumenta ligg føre på eit anna språk, kan Helfo ved behov be deg om å få desse omsett. Du må betale for omsettinga sjølv. Dersom du legg ved ei omsetting, må du òg legge ved originalen.

Du kan få innvilga dekning til delar av reiseutgiftene dine tilsvarande det du ville fått i Noreg.

I Noreg er hovudregelen at du får dekt reisa di med ein standardsats per kilometer, uansett kva transportmiddel du har brukt. Du må reise til den geografisk nærmaste staden helsetenesta kan givast. For å få dekning må reisa vere lengre enn ti kilometer kvar veg og koste meir enn lokal minstetakst med rutegåande transportmiddel.

Reiseutgifter som gir krav på refusjon, skal sendast på dette søknadsskjemaet:

Send søknadsskjemaet saman med annan dokumentasjon – sjå neste steg. Dersom du får innvilga dekning av utgiftene dine hos Helfo, sender Helfo søknaden om reiseutgifter vidare til Pasientreiser. 

Du må sende skjema og dokumentasjon til Helfo innan 6 månadar frå behandlingsdato. Dersom du ikkje har gjort opp på staden, men har fått ein faktura i etterkant, bereknar vi fristen frå fakturadatoen i staden for behandlingsdatoen. Med faktura meiner vi i denne samanhengen den første betalingsoppfordringa / det første betalingskravet som er sendt frå behandlaren. 

For detaljar om dokumentasjonskrav, sjå «Hugs dokumentasjon!».

Papirskjema

Dersom du ikkje har høve til å nytte det digitale skjemaet vårt, kan du i staden fylle ut følgande skjema og sende det til Helfo, Postboks 2415, 3104 Tønsberg:

Saksbehandlingstida hos Helfo er inntil 12 veker. 

Dette gjeld òg dersom helsehjelpa er mottatt i eit anna EU/EØS-land.

Det blir berekna ein eigendel under saksbehandlinga av refusjonskravet ditt for utlandsbehandling. Denne eigendelen blir meld inn i eigendelregisteret og dannar grunnlag for frikort for helsetenester. Har du allereie frikort, vil du få eigendelen utbetalt saman med refusjonen.

Når du får frikort frå Helfo, vil du ikkje lenger måtte betale eigendel for helsetenester som inngår i den aktuelle frikortordninga. Frikortet gjeld i Noreg. I andre EU/EØS-land må du legge ut for behandlinga sjølv.

Les meir om eigendelstak og kva helsetenester som blir omfatta av frikortordninga her.​