Om helseopplysningar som blir delte

Du har rett til innsyn i helseopplysningar om deg som blir delte digitalt i helsesektoren. Du kan sjå kva opplysningar som er registrerte, sjekke kven som har sett desse opplysningane og avgrense kven som skal ha tilgang til denne informasjonen.

Slik blir helseopplysningar om deg delte

Helseopplysningar blir delte digitalt i helsevesenet og blir tilgjengeleg for autorisert helsepersonell når dei har behov for relevant informasjon om helsa di. Blir du til dømes lagd inn på eit sjukehus, kan helsepersonell raskt slå opp i fagsystemet deira og finne dei viktigaste helseopplysningane om deg. Dette kan gi deg rett behandling raskare om du blir akutt sjuk.  

Alle fastbuande i Noreg har nasjonale helseopplysningar. Dette gjeld òg barn, og flyktningar når dei får D-nummer.  

Når du får helsehjelp, blir opplysningar om helsa di og behandling registrert i pasientjournalen din på den staden du får behandling. Dokument i pasientjournalen på sjukehus kan delast med andre. Det vil seie om du seinare blir behandla på ein annan stad, kan dokument i pasientjournalen vere tilgjengelege for behandlar. Det er kvart enkelt sjukehus som bestemmer kva dokument som kan delast.

Delt via Kjernejournal og Reseptformidlar

Helseopplysningane om deg blir delte via Kjernejournal og Reseptformidlar. Kjernejournal er eit nasjonalt  helsesystem som deler informasjon med fagsystema til helsepersonell. Reseptformidlar er ein nasjonal database for reseptar som blir brukte av helsepersonell og apotek. 

Helsedirektoratet er dataansvarleg for Kjernejournal og Reseptformidlar. Det betyr at dei er ansvarlege for å behandle informasjon om deg på ein måte som varetar personvernet ditt. Om du lurar på kva som blir lagra om deg utover det du ser i tenesta, kan du kontakte Helsedirektoratet. 

Sjå helseopplysningane om deg

Du må vere innlogga for å sjå helseopplysningane om deg. Det er viktig at du kontrollerer at dei registrerte opplysningane er korrekte, og melder frå om eventuelle feil. Du kan sjølv gjennomføre eigne registreringar. Korrekte opplysningar er viktig om du blir akutt sjuk.

Logg inn og sjå helseopplysningane om deg

Desse helseopplysningane om deg blir delte:

  • Kritisk informasjon er opplysningar om deg som det er viktig at helsepersonell kjenner til i ein akuttsituasjon. Desse helseopplysningane kan bidra til at helsepersonell endrar val av undersøking, behandling og oppfølging av deg på sjukehus.

  • Enkelte opplysningar er kategoriserte som eigne registreringar. Følgande opplysningar kan du sjølv registrere: 

     

  • Helsepersonell kan sjå kva sjukdommar du er vaksinert mot og når vaksinen er sett.  

    Les meir om vaksinane dine 

  • Du kan opprette eit digitalt donorkort som er tilgjengeleg for helsepersonell. Du kan òg legge til ein eller to personar som kjenner til standpunktet ditt til organdonasjon. Desse personane kan vere familie, venar, kollegaar, fastlege eller naboar, og må vere over 18 år. 

    Les meir om donorkort 

  • Følgande opplysningar knytt til reseptar og legemiddel er tilgjengelege for helsepersonell: 

    • Legemiddel du har fått utlevert på resept i norske apotek 
    • Næringsmiddel og forbruksmateriell 
    • Liste over dei gyldige reseptane dine 

    Følgande opplysningar blir ikkje delte: 

    • Legemiddel du har kjøpt utan resept 
    • Legemiddel du har fått utlevert på legevakt, sjukehus, sjukeheim
    • Legemiddel kjøpt i utlandet 
    • Reseptbelagde legemiddel som er utlevert frå apotek før nasjonal deling begynte. 

    Les meir om reseptane dine 

  • Prøvesvar frå nasjonal prøvesvarteneste blir delte i helsesektoren. Det gjer òg svar på utvalde prøver og undersøkingar frå sjukehus i Helse Vest.  

    Prøvesvara for koronavirus er ikkje lenger tilgjengeleg for helsepersonell. Har du fått positive koronaprøvesvar tidlegare, er desse tilgjengelege i Meldingssystemet for smittsame sjukdommar (MSIS) på Helsenorge.Du finn MSIS under Helseregister.  

  • Helsepersonell kan sjå journaldokumenta dine frå sjukehus.  

  • Du kan finne opplysningar om kontakten din med sjukehus og spesialisthelsetenesta. Besøkshistorikk kan òg omfatte avtalespesialistar, som til dømes hudspesialistar eller hjarte- og lungespesialistar. 

    Med kontakt siktar ein til tid og stad for undersøkingar og behandlingar hos spesialisthelsetenesta, som til dømes sjukehus. Dette kan vere polikliniske besøk eller innleggingar. 

    Opplysningane om besøkshistorikken din går tilbake til 01.01 2008. Det kan ta fire veker eller meir frå du har vore på eit sjukehus før opplysningar om dette blir viste på Helsenorge. 

  • Behandlingsplan er under utprøving, og er berre tilgjengeleg for nokre få pasientar. Behandlingsplan skal gi ei heilskapleg oversikt over behandlingsløpet ditt og er tilgjengeleg for helsepersonell.  

  • Digitalt helsekort for gravide er under utprøving, og er berre tilgjengeleg for nokre få pasientar. Opplysningane som er registrerte i det digitale helsekortet er tilgjengelege for helsepersonell.

Kven har tilgang til å sjå helseopplysningane? 

Det er berre autorisert helsepersonell som treng relevant informasjon som har tilgang til å opne helseopplysningane om deg når du er til behandling. Helsepersonell som til dømes jobbar på sjukehus, fastlegekontor, legevakt eller i kommunale pleie- og omsorgstenester kan velje å opne helseopplysningar når dei følger opp behandlinga di.

Logg over bruk 

Du kan sjølv sjekke kven som har sett helseopplysningane om deg. Loggen gir deg innsyn i dato, namn, hending, type opplysningar og bakgrunnen for at helseopplysningane blei opna. Det vil ta éi veke frå nokon har opna helseopplysningane om deg til du kan sjå kven som har sett desse opplysningane. 

Mistanke om snoking 

Om du mistenker at nokon har sett helseopplysningane om deg utan relevant grunn, må du kontakte behandlingsstaden (sjukehuset eller legekontoret) eller kommunen der vedkomande jobbar. Er du ikkje er nøgd med forklaringa du får frå behandlingsstaden, kan du klage til Statsforvaltaren. 

Når legen skriv ein resept til deg, blir dette registrert i loggen. Legen ser på helseopplysningane om deg for å sjekke om du har hatt reaksjonar på tidlegare legemiddel eller for å sjå om annan viktig informasjon er relevant for dei legemidla du skal ta.

Slik kan du kontrollere tilgangen til helseopplysningane

Du kan sjølv avgrense tilgangen for helsepersonell til å sjå helseopplysningane om deg. Du kan òg reservere deg mot å ha Kjernejournal. For deg som er vald ut til utprøving av behandlingsplan eller digitalt helsekort for gravide så kan du gi eller trekke samtykke til utprøvinga. 

Innstillingar for å avgrense tilgang

Du kan velje kva opplysningar du ønsker å avgrense tilgangen til. Ver merksam på at helsepersonell både kan ha tilgang til reseptane dine via Kjernejournal og via Reseptformidlar. Om du ønsker å avgrense helsepersonell sin tilgang til reseptar, må du både sette innstillinga for reseptar delte via Kjernejournal og for reseptar delte via Reseptformidlar.

Meir om tenesta

  • Denne tenesta krev samtykke til tilgangsnivå Basis eller høgare.

    Du kan sjå og endre samtykket ditt under personverninnstillingane.

  • Du kan gi andre fullmakt til å sjå og registrere opplysningar på dine vegner, og du kan få tilsvarande fullmakt frå andre.

    Denne tenesta krev fullmakt til "Innsyn i opplysningar".

    Finn meir informasjon om fullmakter.

  • Tenesta kan brukast på vegner av barn som du har foreldreansvar for, fram til dei fyller 16 år, dersom minst ein av foreldra er folkeregistrerte på same adresse som barnet. Frå barnet fyller 12 år mistar du tilgang til opplysningane som blir delte via kjernejournal, og du mistar tilgang til logg over bruk.

    Les meir om å bruke Helsenorge på vegner av barn.


    Frå 16 år

    Når den du har foreldreansvar for har fylt 16 år, har du ikkje lenger tilgang til helseopplysningane deira. For å få tilgang kan ungdommen sjølv logge seg inn på Helsenorge, eller gi deg fullmakt.

  • Hemmeleg adresse blir ofte kalla «fortruleg adresse» eller «adressesperre».

    Denne tenesta er tilgjengeleg for personar med fortruleg adresse (kode 7) og strengt fortruleg adresse (kode 6), men du har ikkje tilgang til logg over bruk.

    Om du bur på fortruleg eller strengt fortruleg adresse, kan du ikkje bruke Helsenorge på vegner av andre. Andre kan heller ikkje bruke Helsenorge på dine vegner.

Innhaldet er levert av Norsk helsenett

Norsk helsenett. Om helseopplysningar som blir delte. [Internett]. Oslo: Helsedirektoratet; oppdatert onsdag 7. mai 2025 [henta måndag 15. desember 2025]. Tilgjengeleg frå: https://www.helsenorge.no/nn/tjeneste-helseopplysninger-som-deles/om-helseopplysninger-som-deles/

Sist oppdatert onsdag 7. mai 2025