Akutt biholebetennelse

Kva er biholebetennelse?

Biholebetennelse (sinusitt) er ein betennelse i slimhinnene i biholene. Biholene er luftfylte holrom i skjelettet rundt nasen, kinn og panne. 

Tilstanden oppstår ofte i samband med forkjøling eller andre luftvegsinfeksjonar. Slimhinnene hovnar opp og opningane mellom biholene og nasen blir tronge eller tette. Dette kan føra til at slim samlar seg i biholene og gir smerter eller trykkjensle i ansiktet. 

Dei fleste tilfelle av akutt biholebetennelse kjem av virus. I nokre tilfelle kan det utvikla seg ein bakteriell infeksjon. Allergi, som høysnue, kan også bidra til at biholene blir betente.  

Symptom på biholebetennelse

Vanlege symptom er:

• Nasetettleik 

• Rennande nase eller slim i svelget 

• Nasesekret, ofte gult eller grønt 

• Smerter eller trykkjensle i ansiktet, særleg over kinna, rundt auge eller panna 

• Nedsett luktesans 

• Hovudverk som blir forverra når du lenar deg framover 

• Tannverk eller smerter i overkjeven 

• Feber og redusert allmenntilstand kan førekomme 

Når bør du kontakte helsehjelp?

Kontakt fastlegen dersom: 

• du ikkje blir betre innan 10 dagar 
• du først blir betre, men så blir verre igjen 
• du har sterke smerter eller høg feber 

I sjeldne tilfelle kan biholebetennelse forårsake alvorlege komplikasjonar.   

Søk lege raskt dersom du får  

• svært sterk hovudverk eller stiv nakke 
• lysskyheit, dobbeltsyn eller andre synsforstyrringar 
• hevelse, smerter eller rødheit rundt auga, eller smerter når du beveger auga 
• høg feber og påverka allmenntilstand 
• forvirring eller uvanleg døsigheit 

Utredning og diagnose

Diagnosen blir vanlegvis stilt ut frå sjukehistorie og symptoma. Legen kan  

• undersøkja nase og hals  
• trykkja eller banka varsamt over biholene  
• vurdera allmenntilstand 
• ta blodprøve for  å sjå om du har ein infeksjon 

Billeddiagnostikk som røntgen eller CT blir sjeldan brukt, og berre ved mistanke om komplikasjonar eller langvarige plager. 

Dersom du har gjentekne eller langvarige plager, kan du bli tilvist til ein øyre-nase-hals-spesialist.

Behandling av biholebetennelse

I de fleste tilfelle går akutt biholebetennelse over utan medisinsk behandling.  

Reseptfrie smertestillande som paracetamol eller ibuprofen kan lindre smerter og feber. 

Nesespray og andre medisiner 

Kortisonnasespray kan lindre tett nase og redusere betennelse i slimhinna. 

Slimhinneavsvellande medisinar finst som tablettar, nasespray, og dropar. Dei kan redusere tett nase og trykk.  

Du bør ikkje bruke slimhinneavsvellande nasespray i meir enn ei veke.  

Antibiotika

Viss legen mistenker bakteriell  biholebetennelse, kan antibiotika bli vurdert. Dei fleste blir likevel bra utan antibiotika.  

Sjølvhjelp

Du kan prøve: 

• å skylje nasen med saltvatn 
• å bruke saltvasspray 

Dette kan hjelpe med å løyse opp slim og betre luftpassasjen. 

Det kan også hjelpe å liggje med hovudet litt høgt når du søv. 

Prognose

Dei fleste blir bra i løpet av 1–2 veker utan behandling. 

Nokon er plaga med gjentatte biholebetennelsar.