ناروے میں کرونا وائرس کے متعلق اردو میں معلومات

نارویجن حکام کی طرف سے ناروے میں کرونا وائرس کی صورتحال کے لیے اصولوں، ہدایات اور مشوروں کے متعلق اردو میں معلومات

کیا COVID-19  کے متعلق آپ کا کوئی سوال ہے؟ صحت کی ڈائریکٹوریٹ کی معلوماتی فون لائن اب اردو میں دستیاب ہے!

815 55 015

                                                    

قومی سطح پر واجب ہدایات اور اصول

انفیکشن سے بچاؤ کے عام اصول

·       اگر آپ بیمار ہوں تو گھر میں رہیں

·       علامات کی صورت میں اپنا ٹیسٹ کروائیں

·       دوسرے لوگوں سے فاصلہ رکھیں۔ آپ کو لوگوں سے گلے ملنے اور ہاتھ ملانے سے گریز کرنا چاہیے

·       جب دوسروں سے کم از کم 1 میٹر فاصلہ رکھنا ممکن نہ ہو تو ماسک پہننا لازمی ہے۔ مثال کے طور پر دکانوں، شاپنگ سنٹروں، پب کیفے اور ریستوران وغیرہ، پبلک ٹرانسپورٹ اور ٹیکسی میں

·       آپ کے گھر میں اس گھر میں رہنے والوں کے علاوہ 10 سے زیادہ مہمانوں کو موجود نہیں ہونا چاہیے۔ کرسمس اور نئے سال کے تہوار میں آپ کے گھر 20 تک مہمان آ سکتے ہیں لیکن مہمانوں کے درمیان 1 میٹر کا فاصلہ رہنا چاہیے

·       بالغ افراد کو قریبی کانٹیکٹس (واسطوں) کی تعداد کم کرنی چاہیے

·       اکثر ہاتھ دھوتے رہیں

خطرے سے دوچار گروہوں اور ان لوگوں کو بچ کر رہنا چاہیے جن کی ویکسینیشن نہیں ہوئی۔

کرونا وائرس کی علامات

کرونا وائرس کی علامات

کرونا وائرس کی علامات حال ہی میں ہونے والا بخار، کھانسی، سانس لینے میں مشکل، سر میں درد، سستی، سونگھنے یا چکھنے کی حسّ میں کمی اور پٹھوں میں درد ہو سکتی ہیں۔ گلے میں درد یا خراش، ناک بہنے یا ناک بند ہونے اور چھینکیں آنے کی علامات بھی ہو سکتی ہیں۔

اگر آپ یقین سے نہ جانتے ہوں کہ آپ کی علامات کرونا وائرس ہیں یا نہیں تو آپ کو اپنا ٹیسٹ کروانا چاہیے۔

اگر مجھے علامات پیش ہوں تو مجھے کیا کرنا چاہیے؟

  • اگر آپ بیمار ہوں تو گھر میں رہیں۔
  • اگر آپ کو کرونا وائرس کی علامات پیش ہوں تو اپنا ٹیسٹ کروائیں۔
  • اگر آپ کو کرونا وائرس انفیکشن ہو جائے تو آئسولیشن میں رہیں۔
  • اگر آپ بیمار ہوں اور آپ کو ڈاکٹر کی مدد درکار ہو یا ڈاکٹر کے مشورے کی ضرورت ہو تو اپنے فیملی ڈاکٹر سے فون پر یا الیکٹرانک ذریعے سے رابطہ کریں۔

 ٹیسٹ کہاں کروایا جا سکتا ہے؟

آپ سیلف ٹیسٹ کے ذریعے خود اپنا ٹیسٹ کر سکتے ہیں۔ اگر آپ کے سیلف ٹیسٹ کا نتیجہ مثبت آئے (یعنی ٹیسٹ سے پتہ چلے کہ آپ کو COVID-19  ہے) تو آپ کو بلدیہ کے ٹیسٹنگ سنٹر میں PCR ٹیسٹ کروانا ہو گا۔

آپ ٹیسٹ کی بکنگ کے لیے اپنی بلدیہ سے بھی رابطہ کر سکتے ہیں۔

اپنی بلدیہ کی ویب سائیٹ تلاش کریں۔ 

 آپ کے لیے ٹیسٹنگ جن کا انفیکشن میں مبتلا شخص سے واسطہ ہے

انفیکشن میں مبتلا شخص کے گھر کے افراد اور ایسے ہی دوسرے قریبی افراد

بنیادی اصول کے طور پر انفیکشن میں مبتلا شخص کے تمام قریبی کانٹیکٹس 10 دن انفیکشن کوارنٹین میں گزاریں گے۔قریبی لوگوں کی مثالیں بوائے فرینڈ یا گرل فرینڈ، قریبی سہیلی یا رات کو آپ کے پاس ٹھہرنے والا مہمان ہیں۔

یہاں انفیکشن میں مبتلا شخص میں COVID-19 کی علامات ظاہر ہونے سے پہلے کے 48 گھنٹوں سے کم وقت میں قریبی واسطہ مراد ہے یا علامات نہ رکھنے والے شخص کے ٹیسٹ کے بعد سے قریبی واسطہ مراد ہے۔

کوارنٹین کے دوران ٹیسٹنگ

گھر کے افراد اور ایسے ہی دوسرے قریبی افراد:

  • جلد از جلد ریپڈ اینٹیجن ٹیسٹ، سیلف ٹیسٹ یا PCR ٹیسٹ کے ذریعے اپنا ٹیسٹ کروائیں گے
  • 7 دن کے بعد بھی اپنا PCR ٹیسٹ کروائیں گے۔ اگر یہ ٹیسٹ منفی آئے تو کوارنٹین ختم کی جا سکتی ہے

دیگر قریبی کانٹیکٹس:

دیگر قریبی کانٹیکٹس کی مثالیں ساتھی کارکن یا ہم جماعت ہیں۔

  • یہ 3 دن بعد اپنا PCR ٹیسٹ کروا سکتے ہیں۔ اگر یہ ٹیسٹ منفی آئے تو کام یا سکول کے اوقات میں کوارنٹین ختم کی جا سکتی ہے۔ اس کا مطلب یہ ہے کہ اپنے فارغ وقت میں آپ کو پھر بھی کوارنٹین میں رہنا ہو گا اور آپ مثال کے طور پر دوسروں سے ملنے نہیں جا سکتے اور نہ ہی فرصت کی سرگرمیوں میں شامل ہو سکتے ہیں۔
  • 7 دن بعد آپ نیا ٹیسٹ کروا سکتے ہیں۔ اگر یہ منفی آئے تو آپ کوارنٹین بالکل ختم کر سکتے ہیں۔

کچھ لوگوں کو انفیکشن کوارنٹین سے استثنا حاصل ہے:

  • وہ لوگ جنہیں پچھلے 3 مہینوں میں COVID-19 ہو چکا ہے، انفیکشن کوارنٹین سے مستثنی ہیں۔ یہ وقت آپ کے آئسولیشن سے نکلنے کے بعد اور آپ کے ٹیسٹ کو 3 مہینے گزرنے کے بعد سے شمار ہوتا ہے
  • وہ لوگ جنہیں بوسٹر ڈوز لگ چکی ہے

وہ سب لوگ جنہیں کرونا وائرس ویکسین کی بوسٹر ڈوز (ڈوز 3) لگوائے ہوئے 1 ہفتے سے زیادہ وقت گزر چکا ہے، انفیکشن کوارنٹین سے مستثنی ہیں۔ اگر آپ انفیکشن میں مبتلا شخص کے گھر کے فرد یا ایسے ہی دوسرے قریبی فرد ہیں تو آپ کو 7 دنوں تک روزانہ اپنا سیلف ٹیسٹ یا ریپڈ اینٹیجن ٹیسٹ کرنا ہو گا یا ہر دوسرے دن PCR ٹیسٹ کروانا ہو گا اور اسی صورت میں آپ کو انفیکشن کوارنٹین سے استثنا مل سکتا ہے۔

  • وہ دوسرے قریبی کانٹیکٹس جن کی عمر 18 سال سے کم ہے، انفیکشن کوارنٹین سے مستثنی ہیں۔ مشورہ ہے کہ یہ گروہ انفیکشن میں مبتلا شخص سے قریبی واسطے کے بعد جلد از جلد ٹیسٹ کروائے اور پھر قریبی واسطے کے دن 3 اور دن 7 پر بھی ٹیسٹ کروائے۔

دیگر قریبی کانٹیکٹس کی مثالیں ساتھی کارکن یا ہم جماعت ہو سکتے ہیں۔

گھر کے افراد یا ایسے ہی دوسرے قریبی کانٹیکٹس کو انفیکشن کوارنٹین میں رہنا ہو گا۔

جب آپ کرونا وائرس ٹیسٹ کے نتیجے کا انتظار کر رہے ہوں

جب آپ کرونا وائرس ٹیسٹ کے نتیجے کا انتظار کر رہے ہوں تو آپ کو ٹیسٹ کا منفی نتیجہ ملنے تک گھر میں رہنا چاہیے۔ اگر نتیجہ مثبت ہو تو آپ کو آئسولیشن شروع کرنی ہو گی۔

انفیکشن کوارنٹین کیسے مکمل کی جائے؟

آپ اپنے گھر یا کسی اور مناسب قیامگاہ میں انفیکشن کوارنٹین پوری کر سکتے ہیں۔ کسی اور مناسب قیامگاہ کو استعمال کرتے ہوئے یہ ضروری ہے کہ آپ کا الگ کمرہ، الگ غسلخانہ اور الگ باورچی خانہ یا کھانا منگوانے کا انتظام ہو۔

انفیکشن کوارنٹین میں موجود لوگوں کے لیے مندرجہ ذیل اصول ہیں:

  • کسی مناسب قیامگاہ یا اپنے گھر میں رہیں۔
  • کام پر، سکول یا بارنے ہاگے میں نہ جائیں۔
  • پبلک ٹرانسپورٹ استعمال نہ کریں۔
  • عوامی مقامات جیسے دکان، فارمیسی اور کیفے وغیرہ میں نہ جائیں۔ اگر آپ کے پاس اور کوئی حل نہ ہو تو آپ ضروری کاموں کے لیے دکان یا فارمیسی میں جا سکتے ہیں۔ دوسرے لوگوں سے خوب فاصلہ رکھیں۔

آپ باہر چہل قدمی کے لیے جا سکتے ہیں لیکن دوسرے لوگوں سے خوب فاصلہ رکھیں۔ اگر آپ میں نظام تنفّس کے انفیکشن کی علامات ہوں تو آپ کو ٹیسٹ کروانے کے لیے اس بلدیہ سے رابطہ کرنا ہو گا جہاں آپ رہتے ہیں یا ٹھہرے ہوئے ہیں۔

آئسولیشن

اگر آپ کے کرونا وائرس ٹیسٹ کا نتیجہ مثبت آئے تو آپ کو آئسولیشن اختیار کرنی ہو گی۔ آپ چھ دن آئسولیشن میں گزارنے کے پابند ہیں۔ یہ اصول ان لوگوں کے لیے بھی ہے جن کی ویکسینیشن ہو چکی ہے۔

اگر آپ کو یا آپ کے بچے کو انفیکشن ہو گيا ہے تو آپ کو یہ ترغیب بھی دی جاتی ہے کہ آپ اپنے قریبی کانٹیکٹس کو اطلاع دیں اور انہیں ٹیسٹ کروانے کے لیے کہیں۔

آئسولیشن کیسے کی جاتی ہے؟

گھر میں آئسولیشن اختیار کرنے والوں کے لیے یہ اصول ہیں:

  • آپ کو تمام وقت گھر میں رہنا ہو گا اور آپ باہر نہیں جا سکتے لیکن آپ اپنے باغیچے یا اپنی بالکنی، ورانڈا یا ٹیرس میں جا سکتے ہیں۔
  • آپ دکانوں پر نہیں جا سکتے۔ اپنی ضرورت کی چیزوں کے لیے آپ کو دوسرے لوگوں سے مدد لینی ہو گی۔
  • آپ کو اپنے ساتھ رہنے والوں سے کم از کم 2 میٹر کا فاصلہ رکھنا ہو گا۔
  • جہاں ممکن ہو، آپ کا کمرہ اور غسلخانہ الگ ہونا چاہیے۔ غسلخانے میں آپ کے استعمال میں آنے والی چیزیں دوسروں کی چیزوں سے الگ ہوں اور آپ کا تولیہ بھی الگ ہونا ضروری ہے۔
  • آپ کو ہاتھوں کی صفائی اور کھانستے ہوئے حفظان صحت کا بہت خیال رکھنا ہو گا تاکہ گھر میں دوسرے لوگوں کو انفیکشن نہ لگے۔
  • گھر میں کثرت سے صفائی کریں، خاص طور پر ان جگہوں کی صفائی کریں جنہیں آپ لوگ اکثر چھوتے ہیں۔

آپ کن جگہوں پر آئسولیشن کر سکتے ہیں

آپ کو اپنے گھر میں یا کسی اور مناسب قیامگاہ میں آئسولیشن میں رہنا ہو گا۔

یہ بلدیہ کی ذمہ داری ہے کہ آپ کے پاس آئسولیشن پوری کرنے کے لیے مناسب جگہ ہو۔ اگر بلدیہ کی رائے میں آپ کا گھر آئسولیشن کے لیے مناسب نہ ہو تو بلدیہ آپ کو ہوٹل یا کسی اور جگہ پر قیام کی پیشکش کرے گی۔گھر سے باہر قیام کے اخراجات بلدیہ اٹھائے گی۔

آپ کو کتنا عرصہ آئسولیشن میں رہنا ہو گا؟

اگر آپ میں علامات ہوں تو آپ ی علامات ظاہر ہونے کے بعد سے کم از کم چھ دن گزر جانے کے بعد اور بخار کی دوائی لیے بغیر جب بخار ختم ہوئے کم از کم 24 گھنٹے گزر چکے ہوں تو آپ آئسولیشن ختم کر سکتے ہیں۔ یہ اصول تب بھی واجب ہے جب آپ کی ویکسینیشن ہو چکی ہو۔

اگر آپ میں علامات  نہ ہوں تو آپ COVID-19 کے مثبت ٹیسٹ کے 6 دن بعد آئسولیشن ختم کر سکتے ہیں۔

یہ اصول تب بھی واجب ہے جب آپ کی ویکسینیشن مکمل ہو۔

ان صورتوں میں بھی آئسولیشن ختم ہو جاتی ہے جب آپ کے گھر کے دوسرے لوگ ابھی آئسولیشن یا کوارنٹین میں ہوں۔

جو لوگ ہسپتال میں ہوں یا جو مدافعتی نظام کو دبانے والی دوائیاں لے رہے ہوں، ان کے لیے آئسولیشن کا تقاضا یہاں دیے گئے وقت سے زیادہ لمبا ہو سکتا ہے۔

آپ کی آئسولیشن پوری ہو جانے کے بعد آپ کو انفیکشن پھیلانے والا تصور نہیں کیا جاتا۔

کرونا وائرس ویکسین

ویکسین کرونا وائرس کی وجہ سے شدید بیماری سے بچاتی ہے۔ نارویجن حکام صحت ان سب لوگوں کو ویکسین لگوانے کا مشورہ دیتے ہیں جو ویکسین لگوا سکتے ہیں۔

آپ کو کرونا وائرس ویکسین پیش کرنا اس بلدیہ کی ذمہ داری ہے جہاں آپ رہتے ہیں یا ٹھہرے ہوئے ہیں۔ ویکسین لگوانا مفت اور آپ کی مرضی پر منحصر ہے۔

وہ سب لوگ جو ایک عرصے سے ناروے میں ہیں، ویکسین لگوانے کا حق رکھتے ہیں، چاہے ملک میں ان کے قیام کی حیثیت کچھ بھی ہو۔

نارویجن انسٹی ٹیوٹ آف پبلک ہیلتھ(FHI)  سب حاملہ خواتین کو ویکسین لگوانے کا مشورہ دیتا ہے اور اب بالغ افراد اور کمزور مدافعتی نظام رکھنے والوں کو ویکسین کی تیسری ڈوز پیش کی جا رہی ہے۔

اگر آپ کو ویکسین کی پیشکش نہیں ملی ہے تو اپنی بلدیہ سے رابطہ کریں۔ ناروے میں صحت کی خدمات حاصل کرتے ہوئے آپ کو ترجمان لینے کا حق حاصل ہوتا ہے۔

بچوں اور نوعمر افراد کے لیے کرونا وائرس ویکسین

یہ طے پایا ہے کہ 16 اور 17 سال عمر کے بچوں کو کرونا وائرس ویکسین کی پیشکش ملے گی۔

12 سے 15 سال عمر کے بچوں کو بھی ویکسین کی پیشکش ملے گی لیکن انہیں فی الحال ایک ڈوز لگے گی۔ 16 سال سے کم عمر کے بچوں کی ویکسینیشن کا حتمی فیصلہ والدین کے ہاتھ میں ہے۔

کرونا وائرس ویکسینز کے متعلق معلوماتی وڈیوز کا لنک۔ یہاں آپ کو معلومات ملیں گی کہ ویکسین کیا ہے، یہ کیسے اثر کرتی ہے اور ہم کس لیے ویکسین لگوائیں۔   

ویکسین کیا ہے؟

ویکسین کیسے کام کرتی ہیں؟

ہمیں CoVID-19 کے خلاف ویکسین کیوں لگائی جا رہی ہے؟

یہ اہم ہے کہ آپ ویکسینیشن کے بعد بھی انفیکشن سے بچاؤ کے عام اصولوں پر عمل کریں۔

سفر

بیرون ملک جانا اور بیرون ملک سے آنا

اندرون ملک سفر

اگر آپ بیمار ہوں تو آپ کو کوئی سفر نہیں کرنا چاہیے۔ سفر کرتے ہوئے انفیکشن سے بچاؤ کے عام اصولوں پر عمل کریں۔

آپ جس بلدیہ میں جا رہے ہوں، وہاں الگ مقامی اقدامات واجب ہو سکتے ہیں، اس لیے سفر سے پہلے اس بلدیہ کی ویب سائیٹ دیکھ لیں۔

سوشل میل جول اور پروگرام

پرائیویٹ گھر اور سماجی میل جول

  • اپنے گھر میں رہنے والے افراد اور دوسرے ایسے قریبی افراد کے علاوہ باقی لوگوں سے 1 میٹر فاصلہ رکھیں۔ بارنے ہاگے اور پرائمری سکول کے بچوں کو استثنا حاصل ہے۔
  • اپنے گھر میں رہنے والوں کے علاوہ زیادہ سے زیادہ 10 مہمانوں کا مشورہ دیا جاتا ہے اور کرسمس اور نئے سال کے تہوار میں زیادہ سے زیادہ 20 مہمان آ سکتے ہیں۔ بارنے ہاگے اور پرائمری سکول کے بچے اپنے درجے/کلاس/سیکشن کے بچوں سے مل سکتے ہیں خواہ یہ مہمانوں کی اس تعداد سے بڑھ جائیں جس کا مشورہ دیا جاتا ہے۔خطرے سے دوچار گروہوں اور ان افراد کو بچ کر رہنا چاہیے جن کی ویکسینیشن نہیں ہوئی۔
  • جب ممکن ہو، میل جول کھلی فضا میں رکھیں۔

قریبی واسطوں کی تعداد محدود رکھیں لیکن اکیلے نہ رہیں۔

عمارتوں کے اندر اور کھلی فضا میں پروگرام رکھنے کے لیے اصول

شراب پیش کرنے کی ممانعت ہو چکی ہے۔ پروگرام منعقد کرنے والا یہ یقینی بنانے کا بھی ذمہ دار ہے کہ تمام مہمان آپس میں 1 میٹر کا فاصلہ رکھ سکتے ہوں، سوائے ان مہمانوں کے جو ایک ہی گھر میں رہتے ہوں یا کسی اور طرح اتنے ہی قریبی ہوں۔

عوامی مقامات، کرایے کے ہالوں/مفت لیے گئے ہالوں میں پرائیویٹ پروگرام/میل جول

عمارتوں کے اندر: زیادہ سے زیادہ 20 افراد، مرحومین کی یاد کی محفلوں میں زیادہ سے زیادہ 50 افراد

کھلی فضا میں: زیادہ سے زیادہ 50 افراد

چہرے پر ماسک پہننا لازمی ہے۔

عمارتوں کے اندر عوامی پروگراممقررہ نشستوں کے بغیر: زیادہ سے زیادہ 20 افراد

مقررہ نشستوں کے ساتھ: زیادہ سے زیادہ 50 افراد۔

چہرے پر ماسک پہننا لازمی ہے۔

کھلی فضا میں عوامی پروگرام

مقررہ نشستوں کے بغیر: زیادہ سے زیادہ 100 افراد

مقررہ نشستوں کے ساتھ: 200 افراد x 3۔

چہرے پر ماسک پہننے کا مشورہ دیا جاتا ہے۔

کام

  • آجر گھر سے کام کرنے کا انتظام کریں گے جہاں یہ ایسی خدمات کو متاثر نہ کرے جن کے لیے کارکنوں کی موجودگی ضروری ہے۔ بچوں، نوجوانوں اور خطرے سے دوچار گروہوں کے لیے خدمات ایسی خدمات ہیں جن میں کارکنوں کی موجودگی ضروری ہے اور گھر سے کام کرنا مناسب نہیں ہے۔

جہاں گھر سے کام کرنا ممکن نہ ہو، ہم آجروں کو کام کے لچکدار اوقات مہیا کرنے کا مشورہ دیتے ہیں۔ اس طرح پبلک ٹرانسپورٹ پر دباؤ کم ہو گا اور مصروف ترین اوقات میں انفیکشن پھیلنے کا خطرہ کم ہو گا۔

چھوٹے بچوں کے نگہداشتی ادارے اور سکول

زیادہ انفیکشن والے سکولوں میں باقاعدگی سے ٹیسٹنگ متعارف کروائی گئی ہے۔

چھوٹے بچوں کے نگہداشتی اداروں اور پرائمری سکول کے بچوں کی پوری کلاس/سیکشن/گروپ کے لیے پروگرام رکھے جا سکتے ہیں جہاں بالغوں کی ضروری تعداد موجود ہو۔

اپنی رہائشی بلدیہ کی ویب سائیٹ پر دیکھیں کہ وہاں سکولوں اور بارنے ہاگر کے لیے کونسے اصول واجب ہیں۔