Lea go dutnje váttis lihkadit dahje nákcet árgabeaivvis, de sáhttá dus leat riekti dikšui dahje čuovvoleapmái veajuiduhttin dahje fámuiduhttinsuorggi fágaolbmuin.
Veajuiduhttin lea ovttasbargu gaskal du, du oapmahaččaid ja fágaolbmuid addin várás dutnje doarjaga vai birget buoremus lági mielde ieš ja ealát bures. Veajuiduhttin lea dávjá olbmuide geat leat riegádan doaibmavádjitvuođaigun, dahje geat buohcagohte dahje vaháguvve mánnán. Oallugat dárbbašit čuovvoleami ja doarjaga olles eallima.
Fámuiduhttin lea ovttasbargu dan hárrái ahte don galggat hárjehallat rupmaša ja vuoiŋŋamaččaid go leat ožžon buozanvuođa dahje vaháguvvan maŋŋel eallimis. Fámuiduhttin bistá dávjá oanehet áiggi, muhto oallugat dárbbašit aŋkke olu veahki ja doarjaga maŋŋel go fámuiduhttin lea loahpahuvvon.
Oktasaš veajuiduhttimis ja fámuiduhttimis lea ahte sáhtát deaivat olu iešguđetlágan fágaolbmuid geat ovttasbarget duinna du ektui. Fágaolbmuin sáhttet leat iešguđetlágan bargovuogit.
Veajuiduhttin ja fámuiduhttin sáhttá leat dan birra movt du rumaš ja vuoiŋŋamaččat doibmet ja maid dovddat ja jurddašat. Sáhttá maiddái leat sáhka movt dus lea iežat árgabeaivvis, ja olbmuiguin geat leat du birra.
Lea dan gieldda ovddasvástádus gos don ásat ahte don oaččut dan čuovvoleami maid dárbbašat.
Jus don dárbbašat čuovvoleami guhkit áiggi ja eanet bálvalusaid, de galgá gielda fállat dutnje koordináhtora ja individuálalaš plána (dárogillii).
Go dus lea dárbu eanet spesialiserejuvvon fálaldagaide go maid du gielda sáhttá fállat, de fállojuvvo dutnje veajuiduhttin ja fámuiduhttin buohcceviesus. De fertejit du gielda ja buohcceviessu ovttasbargat. Don sáhtát lohkat eanet erohusaid birra veajuiduhttimis ja fámuiduhttimis gielddas ja buohcceviesus Dearvvašvuođadirektoráhta siidduin (dárogillii):
Veajuiduhttin ja fámuiduhttin lea ovttasbargu gaskal fágaolbmuid ja du guhte dárbbašat divššu ja čuovvoleami.
Go dutnje fállojuvvo veajuiduhttin ja fámuiduhttin de lea dehálaš ahte don ja dat iešguđetge fágaolbmot geaid deaivvat, bidjabehtet mihttomeriid. Mihttomearit galget dadjat juoidá dan birra mii dutnje lea dehálaš buorráneami dáfus. Danne lea dehálaš ahte don leat fárus mearrideame mihttomeriid. Don ja fágaolbmot galgabehtet maiddái plánet vuorroortnega ja áiggiid dasa mii galgá geavvat. Plánat galget čilget geas lea ovddasvástádus mas ja movt galgá joksat mihttomeriid.
Fámuiduhttintelefovnnas oaččut dieđuid ja bagadusa bálvalusaid ja fálaldagaid ektui mat gávdnjot veajuiduhttimis ja fámuiduhttimis dearvvašvuođaregiovnnas gos don ásat.
Don sáhtát riŋget telefonnummarii 800 300 61 vuossárggas bearjadahkii dii. 09.00-15.00.
Áittardeaddji veahkeha du gažaldagaiguin dearvvašvuođabálvalusaid birra, ja addá ráđi ja bagadusa vuoigatvuođaidat birra.