ناروے میں صحت کے لیے مدد

اگر آپ کو ایسے معائنوں یا علاج کی ضرورت ہو جو جی پی نہیں کر سکتا تو آپ کو ریفرل (کسی ماہر کے پاس بھیجے جانے) کی ضرورت ہوتی ہے۔ ریفرل سے مراد آپ کے جی پی کی طرف سے ایک طرح کی تصدیق ہے کہ آپ کو ہسپتال میں یا کسی سپیشلسٹ (spesialist)سے مزید معائنہ کروانے کی ضرورت ہے۔ 

اس کے علاوہ ماہر نفسیات، ڈینٹسٹ، آپٹیشن (عینک ساز)، مینوئل تھراپسٹ اور کائروپریکٹر بھی مریضوں کو اپنے اپنے شعبے کے سپیشلسٹس کے پاس بھیج سکتے ہیں۔ دائیاں لیبارٹری ٹیسٹوں کے لیے ریفرل دے سکتی ہیں۔ 

جس ہسپتال یا سپیشلسٹ کو ریفرل ملے، اسے 10 دن کے اندر غور کرنا ہو گا کہ آیا آپ کو اس سے معائنہ یا علاج کروانے کا حق حاصل ہے۔ ہنگامی صورتحال میں آپ کے پاس ریفرل ہونا ضروری نہیں ہے۔ 

اگر آپ کو بتایا جائے کہ آپ کو علاج کا حق حاصل ہے تو آپ کو ان سے اپائنٹمنٹ (وقت) ملنے تک انتظار کرنا ہو گا۔ معائنے یا علاج کی اپائنٹمنٹ ملنے میں چند دن سے لے کر کئی مہینوں تک وقت لگ سکتا ہے۔ 

اگر یہ طے پایا ہو کہ آپ کو سپیشلسٹ ہیلتھ سروس (spesialisthelsetjenesten)  میں علاج کا حق حاصل ہے تو آپ کو یہ چننے کا بھی حق ہے کہ آپ کہاں علاج کروانا چاہیں گے۔ 

 آپ پبلک (سرکاری) علاجگاہوں اور حکومت کے ساتھ کانٹریکٹ رکھنے والی پرائیویٹ علاجگاہوں میں سے کوئی چن سکتے ہیں۔ 

آپ علاج کے مختلف حصوں کے لیے مختلف علاجگاہیں چن سکتے ہیں۔ مثال کے طور پر ممکن ہے کہ آپ کے لیے طبی غور(اسیسمنٹ) کسی ایک ادارے میں ہو، آپریشن کسی اور ادارے میں ہو اور بعد میں بحالئ صحت کسی تیسری جگہ پر ہو۔ 

اگر آپ کو علاجگاہ چننے کے لیے رہنمائی یا مشورے کی ضرورت ہو تو اپنے جی پی سے بات کریں یا فون نمبر 23 32 70 00 پر Veiledning Helsenorge کو کال کریں۔ 

علاجگاہ بدلنا 

جس دوران آپ ویٹنگ لسٹ پر ہوں (باری کا انتظار کر رہے ہوں)، آپ اپنی علاجگاہ بدل سکتے ہیں۔ اس صورت میں آپ کو اس علاجگاہ سے رابطہ کرنا چاہیے جہاں آپ ویٹنگ لسٹ پر ہوں اور انہیں بتانا چاہیے کہ وہ آپ کی ریفرل اس علاجگاہ کو بھیج دیں جہاں آپ جانا چاہتے ہیں۔ 

آپ کو ان فیصلوں میں شریک ہونے کا حق حاصل ہے کہ آپ کو کس قسم کا علاج ملے گا۔ اسے مل کر فیصلے کرنا (samvalg)کہتے ہیں اور آپ عملۂ صحت کے ساتھ مل کر فیصلے کرتے ہیں۔ 

مل کر فیصلے کرتے ہوئے آپ کو علاج اور معائنوں کے مختلف طریقوں کے فوائد اور نقصانات بتائے جائیں گے۔ اس طرح آپ ان سب چیزوں کو سامنے رکھ کر غور کر سکتے ہیں کہ آپ کے لیے کیا اہم ہے۔ عملۂ صحت اس کام میں آپ کی مدد کرتا ہے۔ 

آپ چاہیں تو یہ فیصلے عملۂ صحت یا اپنے لواحقین پر بھی چھوڑ سکتے ہیں۔ 

بالغ افراد کو سرکاری خدماتِ صحت سے علاج کرواتے ہوئے فیس (egenandel)  ادا کرنی پڑتی ہے۔ 

کئی معالجوں مثلاً فزیوتھراپسٹس اور ماہرین نفسیات نے حکومت کے ساتھ کانٹریکٹ کر رکھا ہے۔ اس کا مطلب ہے کہ آپ کچھ فیس ادا کرتے ہیں لیکن باقی رقم حکومت ادا کرتی ہے۔ علاج کروانے سے پہلے معالج سے فیس اور اخراجات کے متعلق پوچھ لیں۔ 

ہسپتال میں داخل ہونے کے لیے آپ کو کچھ خرچ نہیں کرنا پڑتا لیکن اگر آپ ہسپتال میں ایک ہی ملاقات میں علاج کروا کے واپس جا رہے ہوں یعنی آپ  poliklinikk  میں آؤٹ پیشنٹ ہوں تو آپ کو فیس ادا کرنی ہو گی۔ 

فری کارڈ 

اگر آپ کیلنڈری سال 2023 میں 3040 کرونر سے زیادہ کی فیسیں ادا کر چکے ہوں تو پھر آپ کو فری کارڈ (frikort) مل جاتا ہے۔ فری کارڈ کی وجہ سے آپ کو باقی کیلنڈری سال میں مزید فیسیں ادا نہیں کرنی پڑتیں۔ 

فری کارڈ کے متعلق معلومات آپ کو Helsenorge پر «Frikort og egenandeler»  کے تحت مل جائیں گی۔ آپ ڈیجیٹل فری کارڈ کا سکرین شاٹ لے کر بھی اپنے پاس رکھ سکتے ہیں یا فری کارڈ ملنے کے فیصلے کا پرنٹ آؤٹ ساتھ رکھیں۔ 

اگر آپ کے لیے فیس ادا کرنا ممکن نہ ہو تو بھی آپ کو علاج ملے گا۔ 

اگر آپ ایسی پرائیویٹ خدماتِ صحت سے علاج کروائیں جنہوں نے حکومت کے ساتھ کانٹریکٹ نہیں کیا ہوا تو آپ کو تمام اخراجات خود اٹھانے پڑتے ہیں۔ 

پہلے سے پتہ کر لیں کہ آپ جس ادارے میں علاج کروانا چاہتے ہیں، وہ سرکاری نظام میں شامل ہے یا نہیں۔ 

دانتوں کے علاج کی فیس 

بالغ افراد یعنی 18 سال اور اس سے زیادہ عمر کے لوگوں کو ڈینٹسٹ کے علاج کا خرچ خود اٹھانا پڑتا ہے۔ کچھ استثنا موجود ہیں جیسے دانتوں کی بعض بیماریوں کی صورت میں۔ اپنے ڈینٹسٹ سے پوچھیں کہ آیا آپ کے علاج کا کچھ خرچ حکومت دے سکتی ہے۔ 

اگر علاج کے سال میں آپ کی عمر 19 سے 24 سال کے درمیان ہو تو آپ کو سرکاری ڈینٹل سروس میں سستا علاج کروانے کا حق حاصل ہو سکتا ہے۔ 

اگر آپ حکومت کے خرچ پر علاج کروانے کے لیے سفر کر رہے ہوں تو آپ کو آنے جانے کے لیے مالی مدد مل سکتی ہے۔ عام اصول یہ ہے کہ آپ کو ایک فی کلومیٹر شرح (سٹینڈرڈ ریٹ) کے حساب سے علاج کی خاطر سفر کے لیے مالی مدد ملتی ہے چاہے آپ کسی بھی قسم کی  ٹرانسپورٹ استعمال کریں۔ آپ سفر کرنے کے بعد ہی رقم لینے کی درخواست دے سکتے ہیں۔Helsenorge  پر ڈیجیٹل درخواست دیں یا کاغذ پر چھپا فارم استعمال کریں۔ 

اگر آپ اپنی صحت یا ٹریفک کے مسائل کی وجہ سے خود سفر کا بندوبست نہیں کر سکتے تو آپ کو مدد کے ساتھ سفر (rekvirert reise) کا حق حاصل ہے۔ اس صورت میں Pasientreiser  آپ کے سفر کا انتظام کرتا ہے اور ٹرانسپورٹ کا ذریعہ چنتا ہے۔ ذہن میں رکھنا چاہیے کہ اس میں کچھ وقت لگتا ہے اور جب ممکن ہو، کئی مریض ایک ہی گاڑی میں جاتے ہیں۔ 

آپ مالی مدد کی درخواست میں مدد لینے یا بسلسلہ علاج سفر کے متعلق سوالات پوچھنے کے لیے 05515  پر Pasientreiser سے رابطہ کر سکتے ہیں۔ 

نیشنل انشورنس سکیم (Folketrygden)  ناروے کی فلاحی ریاست کا ایک اہم ستون ہے اور اس کا مقصد ملک میں رہنے والوں کے لیے زندگی کے مختلف حالات میں مالی تحفظ یقینی بنانا ہے۔ بیماری، حمل اور ولادت، بیروزگاری، بڑھاپے، معذوری، وفات اور  کفیل سے محرومی کی صورتوں میں یہ انشورنس لوگوں کو مالی مدد دیتی ہے۔ 

جب آپ ناروے میں رہتے ہوں اور آپ کے ٹیکس کے معاملات اس ملک سے وابستہ ہوں تو بالعموم آپ خود بخود نیشنل انشورنس سکیم کے ممبر بن جاتے ہیں۔ ممبر بننے کے لیے بالعموم ضروری ہے کہ آپ کم از کم 12 مہینے ناروے میں رہنے کا ارادہ رکھتے ہوں۔ 

ناروے سے باہر منتقل ہونے کی صورت میں آپ نیشنل انشورنس سکیم کی ممبرشپ سے محروم ہو سکتے ہیں چاہے آپ مختصر عرصے کے لیے منتقل ہوئے ہوں۔ اگر آپ بیرون ناروے لمبا عرصہ ٹھہرنے کے متعلق سوچ رہے ہوں تو اصولوں کو سمجھ لینا اہم ہے۔ 

ہم سب جسمانی صحت کے ساتھ ساتھ ذہنی صحت بھی رکھتے ہیں۔ جسمانی اور ذہنی صحت کا آپس میں گہرا تعلق ہے اور دونوں ایک دوسری کو متاثر کرتی ہیں۔ 

جسمانی صحت کا مطلب یہ ہے کہ آپ کا جسم کس حالت میں ہے۔ ذہنی صحت کا تعلق آپ کی سوچوں اور احساسات سے اور اس سے ہوتا ہے کہ آپ دوسرے لوگوں سے واسطے میں اور روزمرّہ زندگی میں اپنے بارے میں کیسا محسوس کرتے ہیں۔ 

اچھی ذہنی صحت اسے کہا جا سکتا ہے کہ آپ روزمرّہ زندگی میں اچھا محسوس کرتے ہوں، دوسروں سے وابستگی محسوس کرتے ہوں، زندگی کو بامعنی پاتے ہوں اور عام پیش آنے والے چیلنجوں سے نبٹ سکتے ہوں۔ 

مسائل پیش آنا عام ہے 

آپ کی ذہنی صحت کا حال مختلف دنوں میں مختلف ہو سکتا ہے اور وقت کے ساتھ ساتھ بدل سکتا ہے۔ اکثر لوگوں کی ذہنی صحت زںدگی کے مختلف حصوں میں بدلتی ہے۔ کبھی کبھار ذہنی صحت کے چیلنج پیش آنے کا مطلب یہ نہیں ہے کہ آپ کی ذہنی صحت خراب ہے یا آپ کو کوئی ذہنی بیماری ہے۔ 

روزمرّہ زندگی کے کچھ عام چیلنج یہ ہو سکتے ہیں کہ 

• آپ کا ذہن سوچوں سے بوجھل رہتا ہو/مسلسل فکر رہتی ہو 
• آپ کا موڈ بجھا ہوا ہو یا آپ اداس ہوں 
• آپ ذہنی دباؤ اور بے چینی محسوس کرتے ہوں 
• آپ تنہا محسوس کرتے ہوں 
• آپ کی نیند خراب ہو 

جب آپ مشکلات سے گزر رہے ہوں تو کسی سے اپنے دل کا حال کہنے سے فائدہ ہو سکتا ہے۔ اپنی تکلیفوں کے بارے میں کسی سے بات کرنا عام طور پر بہتری کی طرف پہلا قدم ہوتا ہے۔ اکثر اپنے کسی واقف جیسے گھر کے فرد یا کسی دوست یا اپنے بھروسے کے کسی اور انسان مثلاً کام پر کسی ساتھی یا استاد سے بات کرنا ہی کافی ہوتا ہے۔ 

اگر اپنی سوچوں، احساسات یا حرکتوں کی وجہ سے کافی عرصے تک آپ کے لیے دوستوں اور رشتہ داروں کے ساتھ میل جول مشکل رہے یا آپ وہ چیزیں نہ کر پا رہے ہوں جو آپ عام طور پر کرتے ہیں اور اگر آپ کو لگے کہ آپ خود ان چیزوں کو بدلنے کے قابل نہیں ہیں تو آپ کو مدد حاصل کرنی چاہیے۔ 

کبھی کبھار ہماری ذہنی حالت کے جسمانی اثرات بھی ظاہر ہوتے ہیں لہذا اگر آپ کو لمبے عرصے تک سر میں درد، پیٹ میں درد یا خراب نیند جیسے مسائل رہیں یا عام حالات کی نسبت مسائل زیادہ اکثر پیش آتے رہیں تو بھی آپ کو مدد حاصل کرنی چاہیے۔ 

کیا آپ کو ذہنی صحت کے لیے مدد کی ضرورت ہے؟ 

آپ کو جی پی، پبلک ہیلتھ نرس، ہیلتھ سٹیشن یا ایمرجنسی کلینک سے مدد مل سکتی ہے۔ اگر ضروری ہو تو جی پی آپ کو مزید مدد دلانے کے لیے ریفرل دے سکتا ہے مثلاً ماہر نفسیات کے پاس بھیج سکتا ہے۔ 

کئی کمیونر میں مدد لینا آسان ہوتا ہے اور اس کے لیے کوئی خاص تقاضے نہیں ہوتے یعنی ذہنی صحت کے لیے فوری مدد ملتی ہے۔ اپنے کمیون کی ویب سائیٹ پر دیکھیں کہ آپ کے قریب کونسی خدمات موجود ہیں۔ 

کیا آپ کو ابھی کسی سے بات کرنے کی ضرورت ہے؟ 

اگر آپ کو ابھی کسی سے بات کرنے کی ضرورت ہے تو آپ کو کئی جگہوں سے مدد مل سکتی ہے۔ 

اگر آپ تکلیف دہ سوچوں اور جذبات کے بارے میں کسی کو بتانا اور مشورہ و مدد حاصل کرنا چاہتے ہیں تو آپ یہاں فون کر سکتے ہیں: 

• Mental Helse sin hjelptelefon: 116 123 (ذہنی صحت کے لیے امدادی فون لائن) 
• Kirkens SOS: 22 40 00 40 (چرچ کی امدادی سروس) 
• Alarmtelefonen for barn og unge: 116 111 (بچوں اور نوجوانوں کے
• Kors på halsen (Røde Kors) (ریڈ کراس کی امدادی سروس) 

آپ sidetmedord.no یا soschat.noپر چیٹ بھی کر سکتے ہیں۔ 

یہ فون لائنز اور چیٹس دن رات کھلی رہتی ہیں اور آپ کو اپنا نام بتانے کی ضرورت نہیں ہوتی۔ 

ہنگامی مدد کی ضرورت ہونے پر 116 117 پر legevakten کو کال کریں یا ایمرجنسی نمبر 113 ڈائل کریں۔ 

اگر آپ کے ذہن میں خودکشی کے خیالات آتے ہوں تو آپ کیا کر سکتے ہیں؟ 

اگر آپ کے ذہن میں خودکشی کے خیالات آتے ہوں تو آپ کیا کر سکتے ہیں؟ 

زندگی کے دوران کئی لوگوں کو کسی نہ کسی وقت خودکشی کا خیال آتا ہے۔ اس کی وجوہات اکثر پیچیدہ ہوتی ہیں۔ خودکشی کا خیال زندگی میں دباؤ پیدا کرنے والے حالات کی وجہ سے آ سکتا ہے جیسے طلاق یا رشتہ ٹوٹنا، لڑائی جھگڑے، بیماری، کام پر مسائل، مالی مشکلات، ذہنی مسائل یا ذہنی بیماریوں مثلاً ڈپریشن کی وجہ سے۔ 

خودکشی کے خیالات کے متعلق دوسروں سے بات کرنا مشکل ہو سکتا ہے۔ شاید آپ کو لگتا ہو کہ سب راستے بند ہیں اور حالات کو بدلنے کے لیے کوئی حل موجود نہیں ہے۔ 

اگر آپ سوچتے ہوں کہ زندگی کی تکلیفیں آپ کی برداشت سے باہر ہو چکی ہیں تو کسی کو اپنی حالت سمجھنے کا موقع دیں۔ اپنے بھروسے کے کسی شخص جیسے گھر کے فرد، قریبی دوست، جی پی، پبلک ہیلتھ نرس، استاد، امام یا پادری سے بات کریں۔ اگر آپ اپنا نام چھپانا چاہتے ہوں تو آپ کسی امدادی فون لائن یا چیٹ سروس سے رابطہ کر سکتے ہیں۔ کسی سے بات کرنے پر آپ کو حل سمجھنے کے لیے مدد مل سکتی ہے۔ مشکلات میں راستہ نکالنے کے لیے یہی پہلا قدم ہے۔ 

اگر ایسے خیالات ذہن پر چھا جائیں اور آپ کو لگے کہ آپ کے خود کو نقصان پہنچا لینے یا خودکشی کر لینے کا خطرہ ہے تو 113 پر کال کریں۔ یہاں کال کرنے پر آپ کو فوری مدد ملتی ہے اور آپ سے بات کرنے والے لوگ آپ کو مزید مدد دلانے کا انتظام کریں گے۔ 

اگر آپ کے خیال میں کوئی اور خودکشی کا سوچتا ہو تو آپ کو کیا کرنا چاہیے؟ 

اگر آپ کو لگے کہ کوئی خودکشی کا سوچ رہا ہے تو یہ اہم ہے کہ آپ اس کی پروا کرنے کی ہمت کریں اور اس بارے میں خود بات شروع کریں۔ 

دوسروں سے خودکشی کے خیالات کے متعلق پوچھنا مشکل ہو سکتا ہے۔ کئی لوگ ڈرتے ہیں کہ خودکشی کے خیالات کے متعلق پوچھنے سے دوسرے شخص کے خودکشی کر لینے کا خطرہ بڑھ جائے گا۔ یہ درست نہیں ہے۔ ایسے کوئی ثبوت نہیں ہیں کہ خودکشی کے خیالات کے متعلق بات کرنا خطرناک ہے یا اس کی وجہ سے خودکشی کا خیال اور پکا ہو سکتا ہے۔ 

اگر کوئی آپ کو بتائے کہ وہ خودکشی کا سوچتا ہے تو اس کی بات کو سنجیدگی سے لیں۔ آپ جو سب سے اہم کام کر سکتے ہیں، وہ دھیان سے بات سننا ہے۔ اسے اپنی سوچیں بتانے دیں اور اس کی بات زیادہ نہ کاٹیں۔ 

خودکشی کا سوچنے والے لوگ اکثر ان خیالات کی وجہ سے تنہا محسوس کرتے ہیں اور ان میں ناامیدی پیدا ہو سکتی ہے۔ اس لیے یہ اہم ہے کہ آپ تنقید نہ کریں بلکہ برداشت، احساس اور سہارا دینے کا مظاہرہ کریں۔ 

جب انسان شدید تکلیف دہ جذبات سے گزر رہا ہو تو اس کی ساری توجہ اسی طرف ہوتی ہے۔ خودکشی کا سوچنے والے شخص کو اس طرح بہت مدد مل سکتی ہے کہ آپ اس سے رابطے میں رہیں اور اس کا ساتھ دینے مثلاً اس کے ساتھ جی پی، ایمرجنسی کلینک یا صحت کی دوسری سروسز میں جانے کی پیشکش کریں۔ اگر آپ طے نہ کر سکتے ہوں کہ کیا کرنا ٹھیک ہے تو آپ ایمرجنسی کلینک یا اپنے جی پی سے مشورہ اور رہنمائی مانگ سکتے ہیں۔