Gie toelhkem dongkedh?
Healsoedïenesjen dïedte maehteles toelhkem dongkedh.
Maahta geerve årrodh daejredh jis toelhkem daarpesjibie. Dïhte lea dah
hoksebarkijh gïeh åajvahkommes vuarjasjieh jis toelhke daarpesje. Datne
maahtah aaj bïeljelidh jis toelhkem daarpesjh, vuesiehtimmien gaavhtan
gosse tæjmoem dongkedh. Datne aaj maahtah healsoedïenesjasse ringkedh
jïh desnie toelhkem dov gïelesne dongkedh.
Skjeerme- jallh telefovnetoelhke maahta muvhten aejkien seamma hijven
årrodh goh toelhkem utnedh tjïehtjelisnie.
Toelhkelaake jeahta byjjes åårganh dïedtem utnieh maehteles toelhkem
utnedh.
Gie maahta toelhkestidh?
Toelhke edtja almetje årrodh mij toelhkeööhpehtimmiem åtna.
Eah maanah edtjh toelhkine åtnasovvedh. Jeatjah åelieh jallh almetjh mah
eah naan toelhkeööhpehtimmiem utnieh, eah edtjh toelhkem nuhtjedh
sijjeste maehteles toelhke.
Man åvteste tjoerh jïjtje toelhkem utnedh?
Vihkeles datne healsoedïenesjasse soptsesth veele mij gïelide datne tuhtjh
bööremes.
Gosse toelhkem dongkeme soptsestallemasse, dle vihkeles båetedh dov
tæjmose. Jis ih maehtieh båetedh dan tæjmose, byörh dam jiehtedh ih
båetieh 24 tæjmoeh åvtelhbodti. Jis ih datne dam darjoeh tjoerh læjhkan
maeksedh konsultasjovnen åvteste. Joekoen vihkeles dam mujhtedh gosse
toelhkem dongkedh.
Mij lea toelhke jïh mah toelhken laavenjassh?
Toelhken sjeavodhdïedte jïh ij edtjh giejnie soptsestidh dan bïjre maam
toelhkeme soptsestallemisnie jeahteme.
Toelhke edtja ajve dam jarkoestidh mij jeahtasåvva, ij raeriem vedtedh jallh
jïjtsh mïelh lissiehtidh. Toelhke edtja nøytraale årrodh jïh ij naan mïelh
utnieh.
Goh skïemtjije datne hoksebarkijidie soptsesth. Gaajhkh gyhtjelassh edtjh
dan gaavhtan healsoebarkijidie gihtjedh, jïh ij toelhkese.
Gie toelhkem maaksa?
Toelhke namhtah dutnjien goh skïemtjije healsoedïenesjisnie. Mohte jis
baeniedåakteren gåajkoe mænna jïh jïjtje tjuara maeksedh baeniegeehtemen
åvteste. Dellie tjoerh aaj toelhkem maeksedh.
Datne maahtah laejhtedh
Jis ih toelhkem åadtjoeh, jalhts datne mïelh dam daarpesjh, maahtah dellie
laejhtedh dejnie institusjovnine gusnie datne leah skïemtjije. Datne maahtah
aaj klååkedh staaten åelide dov fylhkesne, Pasient- og brukerombudet jallh Likestillings- och diskrimineringsombudet.
Jis ih toelhkem fuakah maahtah dam laejhtedh dejnie institusjovnine gusnie
datne leah skïemtjije.