Dulka dearvvašvuođabálvalusas

Dus lea riekti beassat gulahallat iežat gillii go boađát dearvvašvuođabálvalussii. Dus lea riekti oažžut dulkka vaikko humat ge dárogiela beaivválaččat.

Gii diŋgo dulkka?

Lea dearvvašvuođabálvalusa geatnegasvuohta diŋgot dohkálaš dulkka.

Sáhttá leat váttis diehtit dárbbašuvvo go dulka. Leat dearvvašvuođabargit geat dábálaččat árvvoštallet lea go dárbu dulkii. Jus don ieš oaivvildat ahte dárbbahat dulkka, de sáhtát maiddái dieđihit dan dalle go don ovdamearkka dihte diŋgot diimmu. Don sáhtát maiddái riŋget dearvvašvuođabálvalussii ja bivdit sin diŋgot dutnje dulkka gii hálddašat dan giela maid ieš humat.    

Muhtomin sáhttá dulkon neahta/šearpma ja telefovnna bokte leat buorre molssaeaktu dan ektui go dulka lea ieš das lanjas.

Dulkalágas čuožžu ahte almmolaš orgánain lea geatnegasvuohta atnit dohkálaš dulkka.

Gii sáhttá dulkot?

Dulka sáhttá leat olmmoš geas lea dulkaoahppu.

Mánáid ii galgga atnit dulkan. Eará oapmahaččaid dehe olbmuid geain ii leat dulkaoahppu eai maid berre adnojuvvot dulkan dohkálaš oahppan dulkkaid sajis.  

Maid don ieš fertet atnit muittus go dárbbašat dulkka?

Lea dehálaš ahte don muitalat dearvvašvuođabálvalussii juste makkár gielat dulkka háliidat.

Go lea diŋgojuvvon dulka ságastallamii, de lea dehálaš ahte don boađát diibmui šihttojuvvon áiggi. Jus don it sáhte boahtit šihttojuvvon diibmui, de fertet cealkit diimmu eret maŋemusat 24 diimmu ovdal dan. Jus it, de fertet liikkáge máksit ságastallandiimmu ovddas. Dan lea earenoamáš dehálaš muitit dalle go dulka lea diŋgojuvvon.

Mii lea dulka ja mat leat dulkka barggut?

Dulkkas lea jávohisvuođageatnegasvuohta ja ii galgga geasage muitalit dan mii boahtá ovdan dulkojuvvon ságastallamis.  

Dulka galgá dušše dulkot dan mii daddjojuvvo, ii addit ráđiid dehe lasihit iežas oaiviliid dasa. Dulka galgá leat neutrála ja ii bealuštit goappáge beali.

Pasieantan don gulahalat dearvvašvuođabargiiguin. Buot gažaldagat galget danne jerrojuvvot dearvvašvuođabargiin, eaige dulkkas.  

Gii máksá dulkka ovddas?

Dulka lea nuvttá dutnje gii leat pasieanta dearvvašvuođabálvalusas, earret dalle go galggat bátnedoaktára lusa ja ieš fertet máksit bátnedivššu. Dalle fertet maiddái ieš máksit dulkka ovddas.

Don sáhtát váidit

Jus don it oaččo dulkka, vaikko vel oaivvildat ge ahte don dárbbašat dan, de sáhtát sáddet váidaga dan ásahussii gos don leat pasieantan. Don sáhtát maiddái sáddet váidaga iežat fylkka stáhtahálddašeaddjái, Pasient- og brukerombudet dehe Likestillings- og diskrimineringsombudet.

Jus don it leat duhtavaš dulkkain, de sáhtát sáddet váidaga dan birra dan ásahussii gos don leat pasieantan.  

Dulkaláhka. 2021. Lov om offentlige organers ansvar for bruk av tolk mv. av 2021-06-11 nr 79 (Láhka almmolaš orgánaid ovddasvástádusa birra atnit dulkkaid jnv.)  

Sisdoalu lea almmuhan Helsedirektoratet

Helsedirektoratet. Dulka dearvvašvuođabálvalusas. [Interneahtta]. Oslo: Dearvvašvuođadirektoráhta; ođasmahtton 2022 golggotmánnu 28, bearjadat [vižžon 2024 miessemánnu 26, sotnabeaivi]. Oažžumis dáppe: https://www.helsenorge.no/se/rettigheter/tolk/

Maŋimusat ođastuvvon 2022 golggotmánnu 28, bearjadat